Sandatang Barko: EU nagbabala sa lumalalang banta mula sa 'shadow fleet' ng Russia

Ayon kay Robert Stanley | 2025-05-22

Ang shadow fleet ng Russia -- mga oil tanker na hindi sumusunod sa mga internasyonal na pamantayan upang iwasan ang mga parusa -- ay pinaghihinalaang ginagamit sa pagmamanman, pangangalap ng signal intelligence, at iba pang mga lihim na operasyon, ayon sa babala ng mga pinuno ng Europe.

Lalong lumalim ang mga hinala noong Mayo 21 nang ipahayag ni Polish Prime Minister Donald Tusk sa isang post sa X na isang barkong Russian ang naitala na gumagawa ng "kahina-hinalang galaw" malapit sa mga kable ng kuryente sa ilalim ng dagat na nag-uugnay sa Poland at Sweden.

Isang araw bago nito, inilunsad ng European Union (EU) ang mga bagong hanay ng parusa kung saan kinilala ang 342 barkong tanker bilang bahagi ng pagsisikap ng Moscow na iwasan ang ipinataw na limitasyon ng Kanluran sa pag-export ng langis.

Ipinagbawal na ngayon ang pagpasok ng mga barkong ito sa mga pantalan ng EU.

Ang paghihigpit ng EU sa shadow fleet -- na kinikilala sa malabong pagmamay-ari at paggamit ng mga flags of convenience (barkong nakarehistro sa ibang bansa upang itago ang tunay na may-ari) at madalas na pinatatakbong nakapatay ang mga tracking system -- ay nagresulta sa 76% pagbaba ng mga export ng Russian crude oil, na labis na nagpahina sa kakayahan ng Russia na pondohan ang tatlong taong digmaan nito sa Ukraine.

'Delikadong' panahon

Gayunman, hindi pa rin napipigil ng mga parusa ang operasyon ng shadow fleet, habang lumalala ang pagkabahala ng mga pinuno ng Europe sa posibleng pagsabotahe bilang bahagi ng mas malawak na hybrid warfare ng Russia laban sa mga kaalyado ng Ukraine.

"Ipinapakita nito kung gaano kapanganib ang panahong ating ginagalawan, kung gaano kalubha ang sitwasyon sa Baltic Sea,” ayon kay Polish Defense Minister Władysław Kosiniak-Kamysz sa isang press conference matapos ang pahayag ni Tusk.

Matapos bigyang-babala ng sasakyang panghimpapawid ng Poland, na ang naturang barko na ito ay binabantayan, ito ay umalis patungong isang pantalan sa Russia, ani Kosiniak-Kamysz.

"Mula nang sumapi ang Sweden at Finland sa North Atlantic Alliance, naging mahalagang lugar sa dagat ang Baltic Sea, kung saan nagaganap ang pinakamaraming insidente -- ang mga karaniwang insidente ay may kaugnayan sa pagputol ng mga kable… at pagsabotahe,” dagdag niya.

Ipinahayag ng isang senior Polish navy officer sa Reuters na ang barkong tinutukoy ay ang Sun, isang tanker ng shadow fleet na nakarehistro sa ilalim ng watawat ng Antigua.

Hindi natatangi ang mga ganitong insidente.

Noong Disyembre, nasabat ng hukbong pandagat ng Finland ang isang tanker na pinaghihinalaang pumutol ng isang kable ng kuryente at apat na data cable sa pagitan ng Finland at Estonia sa pamamagitan ng paghila ng angkla nito, na ayon sa mga opisyal ng Finland ay bahagi umano ng isang operasyong shadow fleet.

Isang buwan lamang bago nito, isang barkong Chinese ang nasisi sa isang katulad na insidenteng pagputol ng mga data cable na nag-uugnay sa Germany sa Finland at Lithuania sa Sweden.

Noong Oktubre 2023, isang container ship na pagmamay-ari ng Hong Kong na Newnew Polar Bear, na nagmula sa Russia, ay nagdulot ng pinsala sa isang gas pipeline sa Baltic Sea at sa dalawang telecommunication cable sa pagitan ng Estonia at Finland matapos hilahin ang angkla nito.

Pagdaan ng Russian fighter jet

Ang mga insidenteng ito ay nagdaragdag sa tensiyon sa Baltic Sea, na napapalibutan ng walong bansa sa NATO at nagsisilbing daan patungo sa tanging mga pantalan sa hilaga ng Russia na bukas buong taon.

Noong nakaraang linggo, sinabi ni Estonian Foreign Minister Margus Tsahkna na nilabag ng isang Russian fighter jet ang himpapawid ng NATO makalipas ang pagharang ng hukbong pandagat ng Estonia sa isang barkong bahagi ng shadow fleet, ang Jaguar, sa Baltic Sea. Ang barko ay tumatakbo nang walang watawat at mukhang walang insurance.

Habang pinahinto ang barko, nakitang dumaan ang Russian jet. Agad namang nagtungo ang Jaguar sa isang pantalan ng Russia.

"Nilabag ng fighter jet na ito ang teritoryo ng NATO sa loob ng isang minuto. Isa itong bagong insidente,” ani Tsahkna sa isang pulong ng NATO sa Antalya, Turkey, na nagbanggit na ang mga jet ng NATO ay nagmadaling humarang.

"Ang kasong ito ay isa pang halimbawa na nagpapatunay na ang Russia ay nagdudulot ng malubhang banta hindi lamang sa pamamagitan ng kanilang operasyong militar sa Ukraine, kundi sa mas malawak pa na saklaw,” aniya sa isang hiwalay na pahayag.

Rumesponde ang Russia makalipas ang isang linggo sa pamamagitan ng pag-detain sa Sillamäe. Ayon sa Moscow, pumasok ang barko sa nasasakupang katubigan ng Russia habang naglalayag sa isang shipping lane. Pinalaya ito ng Russia pagkatapos ng dalawang araw.

Paniniktik ng submarino

Hindi lamang sa Baltic umiikot ang pagkabahala.

Noong Abril, iniulat ng pahayagang British na The Times na pinalalakas ng Russia ang lihim na operasyon sa Karagatang Atlantikosa pamamagitan ng pagpapadala ng mga submarinong paniniktik at mga barkong may dalubhasang pananaliksik upang maglagay ng mga underwater sensor, na malinaw na nagpapakita ng pagsisikap nito sa pagbantay sa mga nuclear submarine na barko ng United Kingdom.

Ginagampanan ng shadow fleet ang mahalagang papel sa kakayahan ng Russia na makapagbenta ng langis sa halagang higit sa $60 kada bariles na itinakda ng mga kaalyado ng Ukraine. Sa pamamagitan ng pagtatago ng kargamento at destinasyon, naibebenta ng mga barko ang Russian crude oil sa mga mamimiling handang umiwas sa mga ipinataw na parusa.

Ang barko ay binubuo ng mga lumang tanker na madalas na binibiling secondhand at nakarehistro sa ilalim ng flags of convenience tulad ng sa Gabon, the Cook Islands, o iba pang hurisdiksiyong hindi nagpapatupad ng mga parusa o karaniwang regulasyong pangkaligtasan. Marami sa mga ito ay pagmamay-ari ng mga kumpanyang nakabase sa United Arab Emirates o Seychelles, at ilan ay nasa ilalim ng Sovcomflot shipping company na kontrolado ng pamahalaan ng Russia.

Upang makaiwas sa makilala, maraming barko ang pinapatay ang kanilang automatic identification systems, mga elektronikong palatandaan na kinakailangan upang makaiwas sa banggaan at masubaybayan ang galaw ng mga barko. Sa paggawa nito, lalo pang natatago ang kanilang mga aktibidad.