Kim ng North Korea, nanguna sa pagsubok ng warship, target ang mga sandatang nukleyar

Ayon sa AFP | 2025-05-01

Iniulat ng state media noong Abril 30 na ipinag-utos ni North Korean leader Kim Jong Un na agad armasan ng mga sandatang nukleyar ang mga barko ng hukbong-dagat, kasabay ng unang pagsubok ng Pyongyang sa bagong sistema ng sandata para sa barkong pandigma.

Ilang araw bago nito, inilantad ng Pyongyang ang bago nitong barkong pandigma, isang 5,000-toneladang destroyer-class na barkong pandigma na tinatawag na Choe Hyon, na sinasabi ng ilang analyst na malamang ay mayroong mga short-range na taktikal na sandatang nukleyar.

Ayon sa Korean Central News Agency (KCNA), pinangunahan ni Kim ang unang araw ng dalawang araw na pagsubok ng sandata ng destroyer.

Ipinag-utos niya sa mga opisyal na “pabilisin ang pag-aarmas ng nukleyar ng hukbong-dagat," dagdag ng ahensya.

Sinabi noon ng North Korea na ang naturang barko ay may “pinakamalakas ng mga sandata” at na ito ay “opisyal nang magagamit sa unang bahagi ng susunod na taon.”

Sa laki ng barko, maaari itong kargahan ng ship-to-surface at ship-to-air missiles, ayon sa mga analyst.

'Masusing sinusubaybayan' ng Seoul

Ayon sa KCNA, ang pagsubok noong Abril 29 ay kinabibilangan ng “ship-to-ship tactical guided weapon, iba't ibang uri ng mga automatic guns para sa barko, at mga smoke at electronic jamming guns,” sa bagong inilantad na barko.

Sinubukan ng Pyongyang ang “supersonic cruise missile, strategic cruise missile, anti-aircraft missile, at 127-mm ship-based automatic gun” noong Abril 28, dagdag ng KCNA.

Ang sistema ng firepower ng bansa para sa barko ay “epektibong isinama” sa “mga pinakamakapangyarihang paraan ng pagsalakay kabilang ang supersonic cruise missile,strategic cruise missile at tactical ballistic missile," ani Kim.

Ayon sa Defense Ministry ng Seoul, “masusing nitong sinusubaybayan at binabantayan ang mga trend ng paggawa ng barko at pagpapaunlad ng militar ng North Korea,” sa pakikipagtulungan sa United States.

Naglabas ng anunsyo ang Pyongyang ilang araw matapos nitong kumpirmahin sa kauna-unahang pagkakataon na nagpadala ito ng mga sundalo sa Russia upang suportahan ang Moscow sa digmaan nito sa Ukraine.

Kasunduan sa Russia

Ayon sa Moscow noong Abril 26, ang mga sundalong North Korean ay “nagbigay ng malaking tulong sa pagtatagumpay laban sa militar ng Ukraine” sa lalawigan ng Kursk, Russia.

Ayon sa ilang analyst ay tila nakakuha ang Pyongyang ng ilang partikular na sandata mula sa Moscow upang armasan ang mga barkong pandigma nito, posibleng kapalit ng pagpapadala ng mga hukbong militar.

"Mukhang nag-import ang North Korea ng ilang makabagong sandata mula sa Russia kamakailan," sinabi ni Ahn Chan-il, isang dating defector na naging mananaliksik at kasalukuyang namumuno sa World Institute for North Korea Studies, sa AFP.

Ang North Korea ay “binuo at ginamit nang mabisa [ang mga sandata] upang palakasin ang panloob na pagkakaisa at itaas ang moral ng militar," dagdag niya.

Iniulat ng state media noong Abril 26 ang paglulunsad ng Choe Hyon, na nagpakita ng mga litrato ni Kim na dumadalo sa isang seremonya kasama ang kanyang anak na si Ju Ae, na itinuturing ng maraming analyst bilang posibleng kahalili niya.

Noong Marso, nagsagawa ng inspeksyon si Kimsa isang proyekto para bumuo ng submarine na pinapatakbo ng enerhiyang nukleyar,, iginiit na ang “radikal” na pagpapalakas ng hukbong-dagat ay isang mahalagang bahagi ng estratehiyang depensiba ng Pyongyang.

Sa panahong iyon, nanawagan si Kim para sa modernisasyon ng mga pwersa ng hukbong-dagat ng bansa, kabilang ang pag-unlad ng mga barkong pandigma.

Blue-water operations

Ipinagmalaki ng Pyongyang sa mga nakaraang taon na sila ay bumubuo ng mga underwater nuclear attack drones, na maaaring magdulot ng isang “radioactive tsunami,” ngunit pinagdudahan ng mga analyst kung mayroon nga ba silang ganitong uri ng sandata.

Washington -- ang pangunahing kaalyado sa seguridad ng Seoul -- ay pinalakas ang mga magkasanib na pagsasanay militar at pinalawak ang presensya ng mahahalagang kagamitan ng US sa mga nakaraang taon -- kabilang ang isang aircraft carrier at isang submarine na pinatatakbo ng enerhiyang nukleyar -- sa rehiyon upang pigilan ang North Korea.

Paulit-ulit na idineklara ng Pyongyang ang sarili bilang isang bansang may “irreversible” na sandatang nukleyar at madalas nitong kinukondena ang mga magkasanib na ehersisyong US-South Korea bilang mga pagsasanay para sa pananakop.

"Ipinapalagay na ang pagbanggit ng North Korea sa pinabilis na nuclear armament ng hukbong-dagat ay tumutukoy sa pinalakas na operasyonal na kakayahan ng fleet nito sa paggamit ng mga tactical nuclear at strategic missile," ani Yang Moo-jin, pangulo ng University of North Korean Studies sa Seoul.

Ang pagsasanay ngayong linggo ay tila nagbibigay-diin sa pahayag ng North Korea na ang bago nitong barkong pandigma ay may kakayahan para sa tinatawag na blue-water operations, sabi niya sa AFP, na tumutukoy sa mga misyon ng hukbong-dagat na isinasagawa nang malayo sa sariling baybayin.