Kim binalewala ang pumalyang paglulunsad, North Korea gagawa ng bagong barkong pandigma

Ayon sa AFP at Global Watch | 2025-08-11

Ipinipilit ni North Korean leader Kim Jong Un ang planong gumawa ng ikatlong 5,000-toneladang barkong pandigma, sa kabila ng nakakahiya at hayagang kapalpakan sa isa sa kanyang mga pangunahing destroyer na kitang-kitang nasira sa paglulunsad -- isang insidenteng tinawag niya na “kriminal na gawain.”

Iniulat ng state-run media ng North Korea noong Hulyo 22 na nangako ang mga manggagawa sa Nampho Shipyard na maghahatid ng isa pang Choe Hyon-class destroyer sa Oktubre 10, 2026, sa anibersaryo ng naghaharing Workers’ Party.

Ang anunsiyo ay kasunod ng pumalyang paglulunsad noong Mayo na naglantad ng malalaking kahinaan sa modernisasyon ng hukbong-dagat ni Kim.

Sa nasabing paglulunsad sa silangang pantalan ng Chongjin, nagtamo ng matinding pinsala ang destroyer na Kang Kon dahil sa pumalyang side-launch -- isang lumang pamamaraan na hindi na ginagamit ng South Korea.

Nawasak ang bahagi ng ilalim ng barko at naiwan itong nakatagilid sa tubig, isang nakakahiyang tagpo na nasaksihan mismo ni Kim. Mariin niyang binatikos ang kapalpakan bilang “lubos na kapabayaan,” tinawag itong “iresponsable” at isang kriminal na paglabag sa tungkulin. Nangako siyang parurusahan ang mga responsable sa darating na pulong ng Partido.

Ayon sa ulat, naayos na at muling pinalutang ang Kang Kon noong Hunyo, ngunit itinuring itong malinaw na kabiguan sa propaganda at militar para sa Pyongyang.

Ang destroyer, na pinaniniwalaang isa pang barko ng Choe Hyon class na unang ipinakita noong Abril, ay labis na ipinagmalaki ni Kim bilang simbolo ng makabagong lakas-pandagat, na diumano’y armado ng “pinakamakapangyarihang sandata” at posibleng may kakayahang magdala ng mga nuclear-capable short-range missile -- bagaman hindi pa ito napatutunayan.

Naniniwala ang mga opisyal ng South Korea na maaaring tinutulungan ng Russia ang North Korea sa paggawa at pagpapaunlad ng mga barkong pandigma, kapalit ng mga sundalong tutulong sa digmaan ng Moscow laban sa Ukraine. Kung totoo, lalo nitong binigyang-diin ang lumalalim na ugnayang militar ng dalawang rehimen na iniiwasan ng ibang bansa at pinatawan ng mga sanction.

Matinding militarisasyon

Malinaw na taliwas ang ambisyon sa hukbong-dagat ni Kim sa mga suliranin sa loob ng bansa at mga kapalpakan sa operasyon.

Makaraan ang isang araw mula sa pumalyang paglulunsad ng destroyer, nagpaputok ang North Korea ng mga cruise missile sa East Sea -- malamang na pagtatangka para magpakita ng lakas sa gitna ng tumitinding tensyon.

Sa kabila ng mga kabiguang ito, patuloy na isinusulong ni Kim ang pagpapalawak ng militar.

Sa unang bahagi ng taong ito, bumisita siya sa isang pasilidad para sa pagpapaunlad ng nuclear submarine at isinulong ang pamumuhunan sa kakayahan sa ibabaw at ilalim ng dagat.

Ipinahayag ng Pyongyang na sila ay gumagawa rin ng mga underwater nuclear drone na kayang magdulot ng “radioactive tsunami” -- isang pahayag na kinukuwestiyon ng mga analyst.

Sa pagtutulak ni Kim para sa matinding militarisasyon, isinasakripisyo niya ang mga pangunahing pangangailangan ng mga sibilyan, gaya ng serbisyong pangkalusugan at edukasyon.

Habang malaki ang ginagastos ng Pyongyang sa armas, halos 46% ng populasyon ng North Korea -- katumbas ng humigit-kumulang 11.8 milyong tao -- ay dumaranas ng malnutrisyon, ayon sa ulat ng United Nations (UN) na sumuri ng datos mula 2020 hanggang 2022.

Nagbabala si Elizabeth Salmon, UN special rapporteur sa human rights sa North Korea, sa unang bahagi ng taong ito, na ang labis na paggasta ng Pyongyang sa militar ay umaagaw ng pondo na dapat ilaan sa mga pangunahing pangangailangan ng mga mamamayan.

"Hindi sapat ang pamumuhunan ng pamahalaan para matamasa ng mga mamamayan ang kanilang karapatang pantao," ayon sa ulat ni Salmon noong Pebrero 5, na binanggit ang kakulangan sa gamot at kapos na pondo sa mga paaralan.