China, nangangamba sa pagbabago: Ugnayang militar ng Russia at North Korea lumalalim

Ayon kay Robert Stanley | 2025-05-28

Ang pamunuan ng China ay lalong nababahala dahil sa lumalalim na ugnayang militar at diplomatiko sa pagitan ng North Korea at Russia, ayon sa mga analyst, habang nagsisimula nang magbago ang dating matibay na samahan ng Beijing at Pyongyang.

Ang pangunahing dahilan ng pag-aalala ng Beijing ay ang paniniwalang unti-unting lumalayo ang North Korea, na matagal nang itinuturing na kaalyado ng China. Sa mga nakaraang taon, naging mahalagang supplier ng bala at rocket ang Pyongyang upang suportahan ang Moscow sa nagpapatuloy na digmaan nito sa Ukraine.

Bukod dito, kinumpirma nina Pangulong Vladimir Putin ng Russia at Pinunong Kim Jong Un ng North Korea noong Abril 28 ang matagal nang pinaghihinalaan ng maraming bansa: ang mga sundalong North Korean ay aktibong nakikipaglaban kasama ng pwersa ng Russia sa Ukraine.

Bilang kapalit, nagpapadala ang Russia sa North Korea ng langis, gas, mga makabagong teknolohiya, at mga sopistikadong sistema ng depensa sa himpapawid, kabilang na ang mga specialized missile.

Pormal na pinagtibay ng Moscow at Pyongyang ang kanilang ugnayan noong Disyembre nangpinirmahan nila ang isang mutual defense treaty na nagtatakda ng tungkulin sa dalawang bansa na magbigay ng tulong militar sakaling salakayin ang sinuman sa kanila. Ang kasunduan ay nananawagan sa kolektibong pagkilos upang tutulan ang mga parusang ipinapataw ng Kanluran at itinuturing na isang makabuluhang paglalim sa kanilang kooperasyon.

'Ugnayang nagdudulot ng kaguluhan'

Ilang sandali matapos lagdaan ng dalawang pamahalaan ang kasunduan, iniulat ng mga opisyal ng South Korea na nakapagpadala ang Russia ng mga antiaircraft missile sa North Korea. Ayon sa ibang ulat, ang bagong inilunsad na destroyer ng North Korea -- na itinuturing na kanilang pinakamakabagong barkong pandagat -- ay maaaring gumagamit ng radar at makinang mula sa Russia.

"Masigasig na pinatunayan ng China sa ibang mga bansa na hindi ito bahagi ng isang 'ugnayang nagdudulot ng kaguluhan,' at hindi rin nito ninanais ang 'bloc politics' (pagkakaisa ng mga bansang may magkakatulad na layuning pampulitika at interes) sa Northeast Asia," isinulat ni Dennis Wilder, dating CIA deputy assistant director para sa East Asia, sa isang kamakailang post ng Center for Strategic and International Studies sa Georgetown University.

"Gayunpaman, ang mga pagkilos ng North Korea ngayon ay nagbibigay-daan sa mga naniniwala na ang ugnayang ito ay nagsisimula nang mabuo o tuluyan nang nabuo," dagdag niya.

Ayon sa mga ulat, nagsimulang magbigay ng tulong militar ang North Korea sa Russia noong huling bahagi ng 2023 at patuloy na nagpapadala ng mga sundalo mula Oktubre 2024.

Tinatayang umabot sa 14,000 ang mga sundalong North Korean na naipadala sa Ukraine. Pinaniniwalaang mahigit 600 ang napatay sa labanan, habang 4,000 naman ang nasugatan.

Ang lumalalim na ugnayan ay pormal na pinagtibay noong Hunyo 2024, nang lumagda ang Korea at Russia sa isang estratehikong kasunduan na may kasamang probisyon para sa mutual defense.

Nagiging kumplikado ang posisyon ng China sanhi ng kasunduang ito, dahil mayroon din itong mutual defense treaty sa North Korea -- na unang nilagdaan noong 1961 at muling pinagtibay noong 2021 -- na nagbubukas ng posibilidad na mapasama ang China sa isang labanan na ayaw nitong salihan.

Tensyong panrehiyon

Matagal nang itinuturing ng Beijing ang North Korea bilang isang mahirap ngunit kapaki-pakinabang na kaalyado. Ang pagkapoot ng Pyongyang sa United States at South Korea ay ginagamit upang malihis ang atensyon ng America at mga kaalyado nito mula sa masigasig na mga hakbang ng China sa Taiwan Strait at South China Sea.

Gayunpaman, ang lantad na pakikiisa sa North Korea at Russia ay maaaring makasira sa mga pagsisikap ng China na ipakita ang sarili bilang isang tagapagpanatag ng rehiyon, ayon sa mga analyst. Nanganganib din ang panloob na kaguluhan kung ang pag-aalsa sa North Korea ay magdudulot ng pagdagsa ng mga refugee sa Ilog Yalu patungong China.

Ang suporta ng Russia ay hindi lamang naging dahilan ng pagpapalakas ng Pyongyang kundi naging sanhi rin ng pagkasira ng tradisyunal na dominasyon ng China sa pag-unlad ng militar ng North Korea.

Sa isang pahayag sa Kongreso noong Abril, sinabi ni US Forces Korea commander Gen. Xavier Brunson, na ang North Korea ay mayroon na ngayong "puwersang militar na may higit sa 1.3 milyong personnel na may mga kagamitang mula sa Russia, pinalakas, at modernisado."

"Ang pagpapalakas ng North Korea, na suportado ng Russia, ay maaaring magdulot ng tensiyon sa rehiyon na maaaring makaapekto sa mga pagsisikap ng China na mapanatili ang isang matatag na kalagayan para sa pag-unlad ng ekonomiya," isinulat ni Yao Bowen, isang doctoral candidate sa Nanyang Technological University, sa East Asia Forum.

"At ang sobrang pakikiisa sa mga internasyonal na pariah ay posibleng magdulot na lumayo ang mga kaalyado ng China sa Europe at Southeast Asia, na magpahirap sa hangarin nitong maging isang pandaigdigang lider," ani Bowen.

'Laging magkatuwang'

Maaaring ipinahihiwatig na ng China ang pag-aalinlangan nito.

Noong Abril, naaresto ng mga awtoridad ng China ang isang North Korean na IT worker na inakusahan ng pagnanakaw ng mga lihim ng military drone. Ang pag-aresto ay “isang palatandaan na maaaring ginigipit na ng China ang North Korea,” ayon kay Linggong Kong, isang Chinese-North Korean relations specialist sa Auburn University sa estado ng Alabama, United States, sa isinulat niya sa The Diplomat.

"May mga palatandaang naiinis na ang Beijing sa Pyongyang, lalo na sa lumalalim na ugnayan ng North Korea at Moscow," dagdag niya.

Ang nagbabagong ugnayan ay hindi tahasang ipinakita sa pagdiriwang ng Moscow ng Victory Day noong Mayo 9, na nagmamarka ng ika-80 anibersaryo ng pagtatapos ng Ikalawang Digmaang Pandaigdig.

Dinaluhan ni Pangulong Xi Jinping ng China ang parada, habang hindi naman dumalo si Kim Jong-un. Sa halip, bumisita si Kim sa embahada ng Russia sa Pyongyang, kung saan nangakong "patatatagin at pauunlarin ang matagal nang tradisyon ng ugnayang DPRK-Russia, ang marangal na ideolohikal na saligan, at ang matibay na alyansa," ayon sa ulat ng ahensiyang pambalita ng North Korea na KCNA.

"Ang Pyongyang at Moscow ay laging magkakatuwang," ipinahayag ni North Korean Foreign Minister Choe Son Hui, sa ginanap na pagbisita sa embahada, ayon sa ulat ng KCNA.