Alyansang Russia at Iran sa drone, bagong banta sa mundo

Ayon sa Global Watch | 2026-03-10

Habang sinasalakay ng mga Iranian Shahed drone ang himpapawid ng Gulf bilang tugon sa kamakailang pag-atake ng US at Israel, nalalantad ang nakatagong sandigan ng arsenal ng Tehran: ang lumalalim nitong pakikipagtulungan sa Moscow, na matagal nang ginawang mga testing ground ang mga lungsod ng Ukraine para sa parehong nakamamatay na teknolohiya.

Hindi ito nagkataon lamang.

Dahil sa matagal na pamumuhunan ng Russia sa teknolohiya ng drone ng Iran ay nakabuo ito ng isang matibay na sistema ng produksyon na ngayon ay tumatakbo nang may nakababahalang awtonomiya.

Samantala, ang mga hybrid na operasyon sa Eastern Europe, Baltics, at Republic of Georgia ay nagpapakita ng parehong taktika ng agresyon na madaling itanggi ng may pananagutan.

Dahil sa nagpapatuloy na sitwasyon sa Iran, binibigyang-diin ng mga pangyayaring ito ang isang magkakaugnay na hamon na nangangailangan ng matinding pagbabantay.

Malinaw ang mensahe sa Kremlin: nakikita ng malayang mundo ang ugnayang ito at handang harapin sa pamamagitan ng nagkakaisa at magkakaugnay na lakas.

Mga drone ng Iran, tumama sa Gulf

“Sa unang mga araw ng Marso 2026, naglunsad ang Iran ng daan-daang Shahed-136 at Shahed-131 drone laban sa mga pasilidad na may kaugnayan sa US sa UAE, Bahrain, Qatar, Kuwait, at maging sa Turkey.

Bagama’t na-intercept ng mga air defense system ang karamihan, nagdulot pa rin ang mga pag-atake ng mga casualty at pagkasira ng imprastrakturang pang-enerhiya, kabilang ang direktang pagtama malapit sa punong-himpilan ng US Navy Fifth Fleet sa Bahrain.

May mga ulat din na katulad na pag-atake ng mga drone sa teritoryo ng Turkey, na nagpapalawak sa saklaw ng banta sa buong rehiyon.

Ang pagtaas ng tensyon sa rehiyon ay nagaganap din sa Gulf, kung saan nag-host kamakailan ang UAE ng mga mataas na antas ng diplomatikong pag-uusap bilang bahagi ng mas malawak na pagsisikap ng Russia at US na maiwasan ang direktang tunggalian. Ipinapakita nito kung gaano kabilis maaaring maipit ang mga bansa sa Gulf sa pagitan ng panangga at pamamahala ng krisis.

Ang mga murang "kamikaze" drone na ito, na ipinangalan ng Russia na Geran-2, ay libu-libong beses nang ginamit laban sa mga sibilyan sa Ukraine mula pa noong taglagas ng 2022.

Ang pasilidad ng Russia sa Alabuga, Tatarstan, ay nakakapaglabas na ngayon ng mahigit 5,500 Geran-2 drone kada buwan.

Isang kasunduan noong 2023 sa Sahara Thunder ng Iran ang nagbigay ng mga kit, makina, warhead, at komprehensibong pagsasanay.

Kinumpirma sa ulat ng CNN noong Agosto 2025 na 90 porsiyento ng pagbubuo ay isinasagawa na ng Moscow sa loob ng bansa. Lumikha sila ng pabrika na nakakalusot sa mga parusa, habang pinananatili ang husay ng Iran sa mga pag-upgrade tulad ng fiber-optic guidance.

Ang bahaging ito na hindi gaanong naiulat ay nagpapakita na ang mga Iranian technician ay patuloy na sumusuporta sa mga operasyon sa mismong pasilidad, na nagbibigay-daan sa mabilis na pagbabago upang mapahusay ang kakayahang makaiwas sa depensa.

Kasabay nito, lubos nang nailapat at napalawak ng Russia ang teknolohiyang ito sa sarili nilang bansa. Ang alyansang ito ang nagpapatakbo ngayon sa mga kampanya ng dalawang rehimen sa iba't ibang panig ng mundo.

Panggigipit sa silangang bahagi ng Europa

Patuloy ang mapaminsalang gawain ng Russia sa silangang bahagi ng Europa.

Ang GPS jamming sa Baltic ay nagdudulot ng pagkaantala sa mga flight at transportasyon sa dagat, at dumami ang mga insidente noong 2025. Ang mga undersea cable na nag-uugnay sa Finland, Estonia, at Sweden ay nakaranas ng kahina-hinalang pinsala mula sa mga barkong konektado sa Russia.

Sa Republic of Georgia, patuloy ang impluwensya ng Russia sa pamamagitan ng mga kinatawan sa Abkhazia at South Ossetia, kabilang ang mga paglusob sa border at mga kampanya ng disimpormasyon na naglalayong harangin ang adhikain ng Tbilisi na sumali sa EU at NATO.

Samantala, kinakaharap ng Eastern Europe ang mga sabotahe, cyber intrusions, at ang pag-armas sa mga komunidad ng mga etnikong Rusong naninirahan sa ibang bansa.

Nagbigay ng babala ang Latvian analyst na si Māris Cepurītis noong unang bahagi ng 2026: "Palalakasin ng Russia ang hybrid na aktibidad… kabilang ang mga pagtatangkang sabotahe at pagpapalipad ng drone na mahirap tukuyin ang pinagmulan."

Gayunpaman, ipinapakita ng koordinadong paghaharang ng mga bansa sa Gulf na ang sama-samang pagtugon ay maaaring maging matagumpay laban sa mga ganitong banta.

Ang mga taktikang pinaghirapang mabuo ng Ukraine laban sa mga kawan ng Geran drone ay ibinabahagi na rin sa kanilang mga kaalyadong NATO.

Ayon kay dating U.S. Secretary of State Mike Pompeo: "Ginagamit ng Russia ang mga drone ng Iran upang pumatay ng mga sibilyan sa Ukraine."

Ipinakita rin ng mga analyst mula sa Institute for the Study of War na ang pagtutulungan sa depensa ng dalawang bansang ito ay tumutulong na mapalawak ang kanilang impluwensya sa buong mundo.

Ang mas matibay na pagtutulungan -- tulad ng real-time na pagbabahagi ng intelihensya sa pagitan ng NATO, EU, at mga bansa sa Gulf; mas mahihigpit na sanction sa mga piyesang maaaring gamitin sa militar at layuning sibilyan; pinalawak na maritime patrol sa Baltic at Black Sea; at mas mabilis na pamumuhunan sa layered air defense -- ang itinuturing na matibay na tugon sa iisang bantang ito.

Malinaw ang mensahe para sa Moscow: bantay-sarado na ang inyong mga pabrika ng drone, ang mga sabotahe sa kable, at ang inyong mga operasyon ng pagsagabal sa signal.

Kung magkakaisa at magtutulungan ang maraming bansa -- sa pagbabahagi ng impormasyon, pagpapalakas ng depensa, at pagpapatibay ang diplomasya -- mapipigilan nila ang agresyon hanggang mabuwag ang lihim na alyansa ng Russia at Iran at maibabalik ang katatagang batay sa soberanya at internasyonal na batas.