Tumitinding karahasan sa Nigeria: bansang kinukubkob

Ayon sa Global Watch | 2026-02-26

Humaharap ang Nigeria sa lumalalang krisis sa seguridad habang patuloy na naghahasik ng takot ang mga armadong grupo sa mga komunidad sa buong bansa.

Sa pinakahuling bugso ng karahasan, halos 200 katao ang nasawi sa mga pag-atake sa mga estado ng Kwara at Katsina.

Binibigyang-diin ng mga pag-atake ang lumalalang kawalang-katatagan sa hilaga at kanlurang rehiyon ng Nigeria.

Kinondena ni Pangulong Bola Ahmed Tinubu noong Pebrero 5 ang mga pagpaslang sa Kwara bilang "duwag at karumal-dumal" at inihayag ang pagpapadala ng isang batalyon ng hukbo sa ilalim ng Operation Savannah Shield upang labanan ang mga salarin.

Sa kabila ng nagpapatuloy na mga operasyong militar, ang mga pag-atake ay naglantad ng matinding butas sa seguridad at ang kabiguan ng mga awtoridad na mapigilan ang mga ganitong karumal-dumal na krimen.

Mga madugong masaker

Noong Pebrero 3, sinalakay ng mga pinaghihinalaang armadong jihadist ang mga nayon ng Woro at Nuku sa Kwara, na nagresulta sa pagkasawi ng hindi bababa sa 170 katao.

Isinalaysay ng mga nakaligtas kung paano tinipon ng mga salarin ang mga residente, itinali ang kanilang mga kamay sa likuran, at saka sila pinaslang.

Tinupok ng apoy ang mga kabahayan at pamilihan, dahilan upang mapilitan ang mga residente na tumakas patungo sa kalapit na kasukalan.

Makikita sa mga kuha mula sa pinangyarihan ang mga duguang nakahandusay na bangkay, habang tinutupok ng apoy ang mga kabahayan sa likuran.

Binatikos ng Amnesty International ang mga pagkukulang sa seguridad na nagbigay-daan sa pag-atake, at binanggit na ilang buwan nang nagpapadala ng mga liham-babala ang mga armadong salarin sa mga residente dahil sa pagtanggi ng mga ito sa ekstremistang ideolohiyang Islamist.

Tinawag ni Gobernador AbdulRahman AbdulRazaq ng Kwara ang pag-atake bilang isang "duwag na pagpapakita ng desperasyon" ng mga maliliit na grupo ng mga terorista bilang tugon sa nagpapatuloy na mga operasyong militar.

Nagpahayag naman ng mahahalagang tagumpay ang militar ng Nigeria sa rehiyon, kabilang ang pagkakapaslang sa hindi bababa sa 150 mandirigma sa mga isinagawang opensiba kamakailan.

Samantala, sa bayan ng Doma sa Katsina, hindi bababa sa 21 katao ang pinaslang ng mga lokal na armadong salarin sa isang hiwalay na pag-atake noong Pebrero 3, kung saan nagbabahay-bahay ang mga ito upang barilin ang kanilang mga biktima.

Inilarawan ng mga residente ang mga salarin na walang-puso, at isinalaysay kung paano nilang hindi pinatawad kahit ang mga nagmamakaawa para sa kanilang buhay.

Winakasan ng pag-atakeng ito ang anim na buwang kasunduang pangkapayapaan sa pagitan ng komunidad at ng armadong grupo na matagal nang naghahasik ng takot sa rehiyon.

Kumplikadong krisis sa seguridad

Masalimuot ang mga suliraning pangseguridad na kinakaharap ng Nigeria. Kung saan may mga mararahas na grupong konektado sa Boko Haram at Islamic State of Iraq and Syria (ISIS) na aktibo sa hilagang-silangan, kasabay ng talamak na pagdukot para sa ransom sa hilagang-kanluran at hilagang-gitnang rehiyon.

Ipinakikita ng mga pag-atake sa Kwara at Katsina ang lumalaking impluwensya ng maliliit na grupo ng mga terorista at ang kabiguan ng mga puwersa ng seguridad na mapigilan ang mga ito.

Dahil sa karahasan, nasadlak sa pagdurusa ang mga komunidad, habang nagluluksa ang mga nakaligtas sa pagkawala ng kanilang mga mahal sa buhay at pilit na bumabangon mula sa sinapit na trahedya. Nailantad din ng mga pag-atake ang mabigat na dilemang kinakaharap ng mga residente sa liblib na bahagi ng hilagang Nigeria, kung saan napipilitan ang ilan na magbigay ng pera at pagkain sa mga armadong grupo kapalit ng pansamantalang kapayapaan.

Gayunpaman, marupok at kadalasang nabibigo ang mga ganitong kasunduan sa pagpigil ng karahasan.

Pinalakas ng pamahalaan ng Nigeria ang mga operasyong militar at nag-anunsyo ng mga bagong inisyatiba laban sa mga armadong grupo, ngunit ang lawak ng krisis ay nangangailangan ng mas komprehensibong solusyon.

Nanawagan ang Amnesty International para sa mas pinaigting na mga hakbang sa seguridad at mas malawak na pananagutan upang maiwasan ang muling pag-atake sa hinaharap.

Ang paglulunsad ni Pangulong Tinubu ng Operation Savannah Shield ay isang hakbang sa tamang direksyon, ngunit kailangang tugunan ng pamahalaan ang mga ugat ng karahasan, kabilang ang kahirapan, katiwalian, at kakulangan ng epektibong pagpapatupad ng batas.

Ang lumalalang karahasan sa Nigeria ay isang matinding babala sa agarang pangangailangan para sa mas pinaigting na mga hakbang sa seguridad at nagkakaisang pagkilos upang labanan ang mga armadong grupo.

Binibigyang-diin ng mga masaker sa Kwara at Katsina ang nakalulunos na pinsala sa tao ng krisis at ang kabiguan ng mga kasalukuyang estratehiya na protektahan ang mga komunidad na nasa panganib. Kung walang mapagpasyang hakbang, magpapatuloy ang siklo ng karahasan, na maglalagay sa mas maraming komunidad sa kamay ng mga armadong grupo at lalo pang magpapalalim sa kawalang-katatagan ng bansa.