Pamamaril sa heneral, nagbunyag ng butas sa seguridad ng Russia

Ayon sa Global Watch | 2026-02-11

Sa isang matapang na pag-atake noong Pebrero 6, 2026, binaril nang tatlong beses si Lt. Gen. Vladimir Alexeyev, deputy head ng GRU military intelligence agency ng Russia, sa hagdanan ng kanyang apartment building sa Moscow.

Gumamit ang salarin ng Makarov pistol na may silencer, na nag-iwan kay Alexeyev sa kritikal na kondisyon matapos ang emergency surgery. Mabilis na pinangalanan ng mga awtoridad ng Russia ang tatlong suspek: si Lyubomir Korba, isang Ukrainian-born Russian citizen na inaakusahang bumaril; si Viktor Vasin, na arestado sa Moscow; at si Zinaida Serebritskaya, na umano’y tumakas patungong Ukraine.

Iginiit ng FSB na ang intelligence ng Ukraine ang nasa likod ng pag-atake, ngunit ayon sa mga eksperto, maaaring ginagamit lamang ang ganitong naratibo upang pagtakpan ang mas malalim na problema sa seguridad sa loob ng Russia.

Hindi ito nag-iisang insidente.

Mula nang lumala ang pananakop ng Russia sa Ukraine noong 2022, lumitaw ang sunud-sunod na pag-atake sa matataas na opisyal, na madalas ay hindi nabibigyang-pansin sa pangunahing balita.

Noong Disyembre 2024, napatay si Lt. Gen. Igor Kirillov, chief ng radiological, chemical, and biological defense troops ng Russia, sa isang pambobomba sa Moscow.

Noong Disyembre 2025, hinarap din ni Lt. Gen. Fanil Sarvarov, hepe ng Operational Training Directorate ng Russian Armed Forces, ang kaparehong sinapit nang pasabugin ang kanyang sasakyan.

Serye ng mga pag-atake

Binibigyang-diin ng mga kasong ito ang isang nakakabahalang takbo ng pangyayari: malayang nakakakilos ang mga assassin sa sentro ng Russia, sinasamantala ang mga butas sa seguridad ng matataas opisyal.

Ayon sa mga analyst, tumaas ang bilang ng mga ganitong operasyon, kung saan hindi bababa sa lima ang naitalang pagpaslang o tangkang pagpaslang sa mga matataas na opisyal ng militar sa nakalipas na dalawang taon.

Ayon sa Center for Strategic Communications ng Ukraine, ang paraan ng pag-atake, paggamit ng baril sa malapitan, ay naiiba sa mga nakaraang insidenteng iniuugnay sa Ukraine na karaniwang gumagamit ng pampasabog. Nagpapahiwatig ito ng posibleng motibo na nagmumula mismo sa loob ng Russia.

Lumilitaw na hindi sapat ang sistema ng seguridad para sa mga heneral tulad ni Alekseyev.

Iniulat ng mga kapitbahay na sira ang mga surveillance camera sa kanyang building, isang simpleng pagkukulang para sa isang GRU deputy at "isang malinaw na palatandaan kung gaano kahina ang seguridad para sa isa sa pinakamataas na opisyal ng intelligence ng Russia,” ayon kay political analyst Giorgi Revishvili sa X.

Hindi tulad ng defense minister o chief of staff, karamihan sa mga heneral ay walang nakatalagang bodyguard at umaasa lamang sa karaniwang mga protocol na napatunayang hindi sapat.

Ipinalalabas ng FSB at ng Investigative Committee ng Russia na isang panlabas na sabotahe ang sanhi ng pamamaril kay Alekseyev. Inaresto si Korba sa Dubai sa tulong ng UAE at agad na ibinalik sa Russia.

Ngunit tulad ng dati, ang mabilis na pagbibintang sa Ukraine ay naglalayong ilihis ang atensyon mula sa mga panloob na problema ng bansa.

Maaaring nakalikha ng mga kaaway sa loob mismo ng Russia ang naging tungkulin ni Alekseyev sa pakikipagnegosasyon noong 2023 Wagner mutiny.

Itong mga panloob na problema ng bansa ay pinalalala pa ng tumataas na gastos sa tao at kagamitan sa digmaan, kaya kumukuha ang Russia ng mga dayuhang sundalo na madalas nalilinlang, pinipilit, at isinasabak sa mabagsik na kondisyon sa harap ng labanan.

Mga panloob na kahinaan

Ipinakikita ng mas malalim na pagsusuri ang butas sa sistema.

Sa isang bihirang pag-amin noong nakaraang taon, kinilala ni Putin na may mga kakulangan sa seguridad matapos ang mga katulad na insidente.

Inilarawan ng UK-based Tactics Institute for Security and Counter-Terrorism ang kaso ni Alekseyev bilang “bahagi ng lumalaking serye ng mga pagpaslang,” na nagpapakita na hindi kayang protektahan ng Russia ang kanilang matataas na opisyal sa militar.

Ayon kay Dominic Waghorn ng Sky News, maaaring nagkaroon ng “malaking kabiguan sa seguridad sa pinakamataas na antas ng military intelligence ng Russia."

Hindi lamang mga indibidwal ang apektado. Sa mga ulat na pati ang mga heneral ay sa opisina na natutulog para sa kanilang kaligtasan, nanganganib ang morale at kakayahan ng pamunuan ng militar ng Russia.

Kasabay nito, ang pamamaril kay Alekseyev ay nagpapakita ng mas malaking krisis: ang kahirapan ng Russia na panatilihin ang seguridad sa loob ng bansa habang abala sa pakikipaglaban sa labas.