France ibabalik ang boluntaryong serbisyo militar dahil sa banta ng Russia

Ayon sa AFP | 2025-12-02

Magsasagawa ang France ng boluntaryong 10-buwang serbisyo militar simula sa susunod na taon, bilang tugon sa nakikita nitong lumalaking banta mula sa Russia.

Halos tatlong dekada matapos alisin ng France ang conscription, sinabi ni President Emmanuel Macron noong Nobyembre 27 na maaaring magpatala ang mga kabataang nasa hustong gulang na nais sumali sa isang 10-buwang serbisyo militar.

“Magkakaroon ng bagong pambansang serbisyo na unti-unting ipatutupad simula sa susunod na tag-init,” sabi niya sa isang talumpati sa mga sundalo sa Varces-Allières-et-Risset sa timog-silangang France.

Ngunit sinabi niya na ang mga boluntaryo, na karamihan ay nasa edad 18 hanggang 19, ay ilalagay lamang sa mga tungkulin "sa loob ng bansa."

Inihayag ang anunsiyo mahigit tatlo’t kalahating taon matapos simulan ng Russia ang malawakang pananakop sa Ukraine, kung saan sina Macron at iba pang opisyal ng France ay nagbabala na maaaring hindi tumigil ang Moscow sa mga border ng Ukraine.

“Kung magkaroon ng isang malaking krisis, maaaring pahintulutan ng parliyamento ang pagtawag hindi lamang sa mga boluntaryo,” dagdag ni Macron, at ang "serbisyo militar ay magiging sapilitan."

“Ngunit bukod sa pambihirang kasong iyon, ang pambansang serbisyong ito ay para sa mga boluntaryo na pipiliin upang matugunan ang pangangailangan ng ating sandatahang lakas.”

Ayon kay Macron, magsisimula ang bagong programa sa 3,000 boluntaryo sa tag-init ng susunod na taon, at unti-unting tataas ito hanggang sa maisama ang 10,000 kabataan sa hukbo pagsapit ng 2030 at 50,000 pagsapit ng 2035.

Karamihan sa mga boluntaryo ay mga kalalakihan at kababaihan na nasa edad 18 at 19, habang ang iba ay hanggang 25 taong gulang at may partikular na kwalipikasyon.

Hindi ipapadala ang mga kabataan sa Ukraine

Bagama't mga labindalawang bansa ang gumagamit ng conscription, hindi pantay-pantay ang paggamit ng serbisyo militar sa buong Europe.

Ngunit kabilang ang France sa mga bansang European tulad ng mga Baltic states na Latvia at Lithuania na muling ipinatupad ito sa mga nakaraang taon, habang ang iba tulad ng Denmark ay pinalakas ang mga tuntunin nito.

Sa ngayon, walang indikasyon na magiging sapilitan ang serbisyo militar sa France, tulad ng dati bago ito alisin ni dating Pangulong Jacques Chirac noong 1997 bilang bahagi ng reporma sa hukbo.

Tinitingnan ang serbisyo militar bilang paraan upang palakasin ang hukbo sa pamamagitan ng mga bagong recruit at upang magkaroon ng malaking bilang ng mga posibleng reservist na maaaring tawagin sakaling magkaroon ng digmaan sa hinaharap.

Ang sandatahang lakas ng France ay may humigit-kumulang 200,000 aktibong tauhan at 47,000 reservist, na inaasahang tataas sa 210,000 at 80,000, ayon sa pagkakasunod, pagsapit ng 2030.

Sinabi rin ng pangulo na nais niyang pawiin ang anumang ideya na “ipadadala namin ang aming mga kabataan sa Ukraine.”