France, nagbabala sa malawakang disimpormasyon ng Russia sa Europe

Ayon sa Global Watch at AFP | 2025-05-15

PARIS -- ang France ay naging pinakabagong bansa sa Europe na nagbabala sa lumalalang kampanya ng disimpormasyon ng Russia na naglalayong guluhin ang mga demokrasya sa kontinente at pahinain ang suporta para sa Ukraine.

Ibinunyag ng mga awtoridad ng France noong Mayo 7 ang halos 80 operasyong panghihimasok na pinangunahan ng Russia mula Agosto 2023 hanggang unang bahagi ng Marso 2025, na pinupuntirya ang Ukraine, France, at iba pang mga kaalyado sa Europe.

Inilarawan ang kampanya bilang "partikular na... epektibo sa pamamahagi ng mga anti-Ukrainian at anti-Western na naratibo sa mga manonood sa Kanluran," ayon sa French agency na tumutugon sa mga online na pag-atake ng ibang bansa, ayon sa Viginum.

Ang tinaguriang kampanyang Storm-1516 ay gumagamit ng artificial intelligence (AI) upang lumikha ng makatotohanang mga profile, nagbabayad sa mga amateur na operator, at nagdudulot ng "malaking banta sa digital na pampublikong diskurso, sa France at sa buong Europe," ayon sa Viginum.

"Binobomba ng mga kampanya ng disimpormasyon ang pampublikong diskurso sa Europa, na pinangungunahan ng mga grupong mula sa Russia, habang ipinamamahagi ng mga Amerikanong radikal na kanan," ipinahayag ni French Foreign Minister Jean-Noel Barrot sa AFP, at idinagdag pa niya na pinuntirya ng mga grupong mula sa Russia ang halalan para sa lehislatura ng France noong 2024.

Malawakang estratehiya ng Russia

Ang Storm-1516 ay bahagi ng isang "digmaang pang-impormasyon" mula sa Kremlin, sabi ng isang diplomatic source sa AFP.

Binigyang-diin sa ulat ng Viginum ang papel ng mga Amerikanong influencer na radikal na kanan o mga pro-Russian na influencer na tulad ni Adrien Bocquet, isang "dating sundalong French na ipinatapon sa Russia," na nagpapalaganap ng maling impormasyon.

Ang digital investigative team ng AFP ay nakakalap at napabulaanan ang ilang maling impormasyon -- kabilang ang umano’y pagbili ni Ukrainian President Volodymyr Zelenskyy ng dating gusaling Nazi sa Germany at isang marangyang hotel sa Courchevel.

Ang mga kaalyado ng Ukraine sa Kanluran, lalo na ang France, ay pinuntirya rin, ayon sa Viginum.

Ang organisasyong lumalaban sa disimpormasyon na NewsGuard ay iniugnay sa Storm-1516 ang isang pekeng video na umano’y nagpapakita sa isang migrante mula Chad na umaamin sa panggagahasa sa isang 12-taong gulang na batang babae sa France; at isa pang AI-generated na video ang maling nag-akusa kay Brigitte Macron, asawa ni Pangulong Emmanuel Macron, ng seksuwal na pag-atake.

Sa "pagiging target ng Moscow"

Ipinapakita ng kampanya ang malawakang estratehiya ng Russia sa pagsasamantala sa mga hidwaang panlipunan sa loob ng mga bansang kasapi ng NATO.

Pinaigting kamakailan ng Kremlin ang mgataktikal na hybrid warfare laban sa Italy, sa pamamagitan ng disimpormasyon, mga cyberattack, at diplomatikong tensyon, upang pahinain ang posisyon ng Rome na pro-Ukraine at lumikha ng alitan sa loob ng mga alyansang Euro-Atlantic nito.

Bagaman hindi pangunahing tagasuporta sa militar o pinansyal ng Ukraine, ang Italy ay naging puntirya dahil sa hayagang suporta sa Kyiv nina Pangulong Sergio Mattarella at Punong Ministro Giorgia Meloni, na ang matibay na pakikiisa sa NATO ay nagtatangi sa kaniya mula sa maraming iba pang kanang lider ng Europe.

"Ang matinding suporta ng Italy sa Ukraine at ang pakikiisa nito sa NATO at transatlantic na relasyon ay naglagay sa bansa sa ‘pagiging target ng Moscow,'" isinulat ni Emanuele Rossi, isang senior analyst na dalubhasa sa internasyonal na politika, sa isang artikulo noong Marso 5 para sa Center for European Policy Analysis, isang think tank na base sa Washington.

Kabilang sa mga pagsisikap ng Russia na guluhin ang Italy ang mga diplomatikong probokasyon, sinuportahan ng bansa na mga kampanya ng propaganda at ipinaghihinalang cyberattacks, na nagpapakita ng malawakang estratehiya ng Kremlin na pahinain ang pagkakaisa ng Europe sa gitna ng kanilang digmaan laban sa Ukraine, dagdag ni Rossi.