Think tank: Australia, dapat gumamit ng ‘unconventional’ na paraan laban sa China, Russia

Ayon sa AFP | 2025-10-24

Dapat matuto ang Australia sa mga nakaraang guerrilla insurgency at magpatupad ng polisiya para sa “unconventional deterrence” sa pagtugon sa mga banta mula sa China, Russia, at iba pang bansa, ayon sa isa sa mga pangunahing think tank ng bansa.

Sa ilalim ng tripartite na kasunduang AUKUS ng Australia, UK at US, makakakuha ang Australia ng hindi bababa sa tatlong Virginia-class submarine mula sa US sa loob ng 15 taon, na may layuning kalauna’y makagawa ng sarili nitong modelo.

Hangga't hindi ito nangyayari, patuloy na haharap ang Canberra sa malaking kakulangan sa depensa nito, ayon sa babala ng ulat ng non-partisan na Australian Strategic Policy Institute (ASPI), na tumatanggap ng pondo mula sa Defense Ministry ng Australia at US State Department.

“Ang tradisyunal na pagdepende ng Australia sa mga ‘malalakas at makapangyarihang kaibigan’ at sa extended nuclear deterrence ay tila hindi na ganoon kasigurado,” ayon sa mga may-akda ng ulat noong Oktubre 15.

“May mga opsyon ang Australia para mapunan ang kasalukuyang kakulangan sa deterrence, kailangan lang nating mag-isip lampas sa mga karaniwang pamamaraan,” dagdag nila.

Kinilala ng ASPI ang “kahinaan” ng Australia kumpara sa mga kalabang gaya ng China, at iginiit na ipinapakita ng mga nakaraang guerrilla war, tulad ng Chechen insurgency laban sa Russia noong 1990s, na kahit maliliit na grupo ay kayang magdulot ng matinding pinsala sa mas malalaking puwersa.

Mga grey-zone tactic: Mga di-tuwirang paraan ng pag-atake

“Ipinapakita ng kasaysayan na ang mga makabagong ideya at mga asymmetric capability ay maaaring magbunga ng mabisang deterrent effect bago pa man at habang nagaganap ang labanan,” ayon sa mga may-akda.

“Ang konsepto ng deterrence ng Australia ay hindi tumutugma sa paraan ng kompetisyong isinasagawa ngayon ng China at iba pang autokratikong rehimen tulad ng Russia, North Korea, at Iran,” babala nila.

Itinuro ng ASPI ang patuloy na paggamit ng Beijing ng tinatawag na mga grey-zone tactics -- cyberwarfare, pananakot, at mga lihim na operasyon na hindi umaabot sa antas ng digmaan -- bilang patunay na kailangan ng Australia ng mas maagap at madaling umangkop na polisiya.

Sinabi rin ng ulat na maaaring matuto ang Canberra mula sa paglalarawan ng dating lider ng Singapore na si Lee Kuan Yew, na tinukoy ang kanilang bansa bilang “poisonous shrimp” -- gayundin sa mga “porcupine” strategy ng Switzerland at ng mga bansang nasa Baltic.

Nanawagan ang ASPI na muling buuin ang posisyon ng National Security Adviser na may malawak na kapangyarihan at superbisyon sa mga ahensiyang pang-intelihensiya ng Canberra, pati na rin ng mga reporma sa mga batas laban sa paniniktik at depensa para maisakatuparan ang bagong polisiya.

Abala ang Australia sa mabilis na pagpapalakas ng sandatahang lakas nito upang patatagin ang depensa laban sa China -- na siya ring pinakamalaking katuwang nito sa kalakalan.

Plano ng Canberra na unti-unting itaas ang paggastos sa depensa sa 2.4% ng gross domestic product -- mas mababa kaysa sa hinihinging 3.5% ng US.