AI ginagamit ng Russia sa labanan ng kaisipan

Ayon kay Olha Chepil | 2025-07-07

Hindi na kailangan ng tangke para magsimula ng digmaan pagdating ika-21 siglo -- sapat na ang isang meme, isang botnet, at isang deepfake. Binago na ng Russia ang makinarya ng propaganda nito para sa digital na labanan, gamit ang artipisyal na intelihensiya, pekeng balita, at mga troll upang pahinain ang tiwala sa halalan, medisina, at demokrasya.

Umaasa noon ang Kremlin sa mga mamamahayag at kamera sa mga TV studio, ngayon, pinalalaganap na nito ang impluwensya gamit ang social media at mga content na nilikha ng artipisyal na intelihensiya (AI).

Dumarami ang mga awtoritaryang rehimen na umaasa sa mga digital tools bilang sandata ng ugnayang panlabas, ayon sa mga mananaliksik.

"Isang labanan ang nagaganap sa pagitan ng mga demokrasya, na gumagamit ng AI upang labanan ang disimpormasyon, at mga rehimen ng awtoritaryan, na ginagawang sandata ang AI sa kanilang ugnayang panlabas. Kabilang dito ang Iran, North Korea, China at siyempre, Russia," ani Olga Tokariuk, isang senior analyst sa Institute for Strategic Dialogue (ISD) ng Britain.

Atake sa kaisipan

Matapos sakupin ng Russia ang Crimea noong 2014 nang labag sa batas, pinalakas nito ang isang malawakang kampanya ng propaganda na lalo pang naging sopistikado. Isa sa mga pangunahing tagapagpatupad ay ang Internet Research Agency na suportado ng Kremlin, na nakialam sa halalan sa US noong 2016. Sa kasalukuyan, kabilang sa mga ginagamit nila ay ang deepfake, neural networks, at mga pekeng account na nagpapanggap na mapagkakatiwalaan.

"Kung dati ay madaling matukoy ang isang Russian troll dahil sa mga maling pagsasalin; ngayon ay halos hindi na mapagkaiba ang mga content na nililikha at isinasalin ng AI mula sa orihinal." ani Tokariuk.

Nagbabala si Tokariuk tungkol sa mga audio deepfake na target ang mga Ukrainian. Sa ilang pagkakataon, nakatanggap ang mga pamilya ng mga pekeng voice message mula sa mga sundalo -- mga pamilyar na boses na humihiling ng pera o nagsasabing, "iniwan na kami." Ginamit din ng Russia ang AI upang baguhin ang mga bahagi ng balita.

"Ang mga Russian ay gumagamit ng AI upang palitan ang mga tunay na boses, kabilang na ang mga ulat sa kanluraning pahayagan. Binabago ang orihinal na panayam upang maisama ang bahagi kung saan isang diumano’y Ukrainian refugee ang nagrereklamo tungkol sa mga ‘taong maiitim’ sa US o sa ‘kasakiman’ ng mga Danish. Isa itong mura ngunit epektibong paraan upang ipakalat ang mga racist at anti-Europe na naratibo na sinasabing nagmumula sa mga Ukrainian," dagdag ni Tokariuk.

Ginagamit ng propaganda ng Russia ang takot, pagkabahala, at kawalang-tiwala nang may nakababahalang kadalasan, ayon kay Andrey Tarasov, isang historian sa Kryvyi Rih State Pedagogical University.

"Ang pangunahing layunin ng sinumang kalaban ay ang maghasik ng kawalang-tiwala at kawalang-pag-asa. Sumasaklaw ito sa lahat ng bagay: ‘Eh, ano pa ba ang magagawa mo?’, ‘Wala namang kwenta.’ Ang anumang pag-atake sa impormasyon ay may tatlong haligi: kawalang-tiwala, takot, at pagkabahala," aniya.

Hindi limitado sa mga lugar ng digmaan ang mga kampanya ng impluwensya ng Russia; umaabot din ito sa halalan at naratibong kultural, aniya.

"Ito ay isang karaniwang pamamaraan, ang pag-impluwensya sa mga halalan sa Romania sa pamamagitan ng pondo at media na sumusuporta sa mga ekstremistang pananaw — sa kaso ng Russia, kadalasan itong retorika ng makakanan," ani Tarasov.

Katotohanan bilang isang kasinungalingan

Isang bagong anyo ng manipulasyon ang tina-target ang mga algoritmo sa halip na sa mga tao.

Ang mga mananaliksik sa ISD, kabilang si Tokariuk, ay nakatukoy ng isang network ng Pravda-mga website na naglalathala ng libu-libong artikulo araw-araw sa mahigit 50 wika, karamihan dito ay halos walang mambabasa.

"Ayon sa aming teorya, ang mga website na ito ay hindi talaga para sa tao kundi para sa artipisyal na intelihensiya. Sinasadyang punuin ng Russia ang [impormasyon] espasyo ng mga nilalaman upang magsilbing datos para sa pagsasanay ng mga Large Language Model at lumabas sa mga tugon ng mga chatbot. Sa katunayan, nagbibigay na ang ChatGPT ng mga link patungo sa mga ganitong mapagkukunan," ani Tokariuk.

Ang nilalaman, dagdag pa niya, ay hindi orihinal. Inuulit nito ang mga naratibong mula sa state media ng Russia, mga channel sa Telegram, at mga hindi kilalang website. Ang mga paksa ay sumusunod sa mga pamilyar na tema ng Kremlin: "Ukrainian Nazis," "korapsyon," "Russia nagliligtas ng mga bata," at "ang Kanluran ay bumabagsak," na paulit-ulit na inilalathala sa iba't ibang wika na may bahagyang pagbabago sa mga pamagat.

"Sinuri ko ang isang paksa: krimen ng mga Ukrainian sa Poland. Nakakita ako ng walong magkakatulad na artikulo mula saPravda sa resulta ng ChatGPT. Lumikha sila ng ilusyon ng pagiging laganap, at ito ay nakaaapekto sa AI," ani Tokariuk.

Nagsisimula nang lumitaw ang materyal sa mga resulta ng paghahanap, mga tala sa Wikipedia, at mga tugon ng chatbot, aniya.

"Kung magpapatuloy ito, maaari tayong magkaroon ng isang henerasyong matututo tungkol sa digmaan mula sa mga mapanganib na pinagmumulan. At ang kasaysayan ay maisusulat hindi batay sa mga katotohanan kundi ng mga algoritmo na sinanay magsinungaling," ani Tokariuk.

Ang mundo ng Russia

Tuluyang lumipat ang propaganda ng Russia sa digital na larangan, iniiwasan ang tradisyonal na media para sa mga social platform, soft power, at AI, ayon sa mga analyst.

"Ang propaganda ng Russia ay hindi na nangangailangan ng tradisyonal na media. [Para sa mga Russian] sapat na ang magpalaganap ng impormasyon sa mga social network," ani Ruslan Sharipov, isang Ukrainian screenwriter, presenter at documentary producer.

"Isang pekeng video ng isang babaeng Ukrainian na may pitong pasaporte na diumano’y tumatanggap ng mga benepisyo -- walang sumusuri nito, ngunit nagdudulot ito ng pagkamuhi. At iyon na lang ang kailangan: garantisado na ang alitan sa pagitan ng mga Ukrainian at Poles."

Ang Russia ay gumagamit ng katulad na mga taktika sa buong Europe, mga kampanyang tina-target upang sirain ang loob at ihiwalay ang mga Ukrainian, aniya. Kabilang dito ang mga pekeng ulat tungkol sa 'Ukrainian virus' sa Rzeszow, Poland, hanggang sa mga deepfake na ginagaya ang mga Ukrainian na komandante."

Ang propaganda ay kumakalat sa pamamagitan ng mga institusyong pangkultura tulad ng Russian Houses at mga sentro ng Rossotrudnichestvo, mga sinasabing pook-kultura na nagpapalaganap ng mga naratibo ng Kremlin. Ang mga samahang ito ang siyang pinag-aralan ni Sharipov para sa kanyang pananaliksik.

"[Ang Rossotrudnichestvo] ay isang lumang ahensya, mula pa noong panahon ng Soviet. Sa kasalukuyan, nagmamay-ari ito ng mga ari-arian sa mga pangunahing lungsod sa Europe, mula Berlin hanggang Paris. Sinasabing nagbabasa [ang mga tagahanga] ng mga akda ni [19th century poet Alexander] Pushkin sa mga 'Russian Houses' na ito," aniya.

"Sa katotohanan, binubuo ng mga opisyal ng Russia ang imahe ng isang bansang mapagmahal sa kapayapaan, mga edukado at may magandang asal, na hindi na isang mananakop, kundi isang tagapagturo," paliwanag ni Sharipov.

Inilarawan niya ang mga sentrong ito, na direktang nasa ilalim ng pamumuno ni Russian President Vladimir Putin, bilang 'mga pugad ng propaganda' na nagpapalaganap ng ideolohiya sa ilalim ng balabal ng kultural na diplomasya at nagpapatakbo sa kabila ng mga sanksyon ng Kanluran."

"Ito ay soft power, kung saan walang satellite o TV channel na direktang nagpapatakbo, ngunit ang mga pook-kultura sa ibang bansa ang nagpapalambot sa imahe ng agresibong Russia. Ito ay hybrid propaganda," aniya.

"Walang magsasabi na si Pushkin ay propaganda. Ngunit sa pamamagitan niya mismo at ni [Soviet cosmonaut Yuri] Gagarin, naipapakita ang imahe ng isang disente at ligtas na Russia."

Ang mga hakbanging propaganda ng Russia -- online man o hindi -- ay nakatuon sa kasalukuyang impluwensya at pangmatagalang pagkokontrol sa naratibo, ayon sa mga analyst.

"May panganib na sa loob ng 10-20 taon, ang kaalaman ng publiko ay hindi na magmumula sa mga aklat kundi sa AI -- at kung ang disimpormasyon ay hindi mapipigilan ngayon, maaaring ang bersyon ng Russia tungkol sa digmaan ang siyang manatili sa ‘mga pahina ng kasaysayan,'" ani Tokariuk.