Russia, pinalalawak ang impluwensiya sa Latin America sa pakikipag-alyansa kay Maduro

Ayon sa AFP at Global Watch | 2025-05-12

Ang Russia, sa isang planadong hakbang upang patatagin ang posisyon nito sa Latin America, ay patuloy na pinalalakas ang suporta kay Nicolás Maduro, ang awtoritaryan na lider ng Venezuela, na lalong pinalalalim ang ugnayan nito sa heopolotikal na kalakaran ng rehiyon.

Ang paglalalim ng alyansang ito ay naganap habang si Maduro ay nahaharap sa tumitinding internasyonal na kritisismo at kaguluhan sa loob ng bansa matapos ang isang kontrobersyal na halalan.

Ang paglagda ng isang komprehensibong kasunduan ng 10-taong pagtutulungan sa pagitan ni Maduro at Russian President Vladimir Putin noong Mayo 7 ay nagpapatibay sa pagtutok ng Moscow sa pagpapalakas sa lider ng Venezuela sa kabila ng mga pagsubok na hinaharap nito.

Ang kasunduan ay sumasaklaw sa "paglaban sa terorismo, ekstremismo, at pagmamanipula sa kasaysayan" pati na rin sa "pagpapalakas ng kooperasyon" sa enerhiya, transportasyon, at iba pang larangan, ayon kay Kremlin aide Yuri Ushakov, sa ulat ng AFP.

Ang pagbisita ni Maduro sa Moscow, na tumapat sa pagdiriwang ng Araw ng Tagumpay ng Russia, ay sinundan ng isang serye ng mga mataas na antas na pakikipag-ugnayan sa pagitan ng mga opisyal ng Venezuela at Russia.

Ang kasunduan, na inilarawan ng Kremlin bilang 'mabigat' at makabuluhan, ay nagpapakita ng estratehikong layunin ng Russia na labanan ang impluwensiya ng Kanluran sa pamamagitan ng pagpapalakas ng mga alyansa sa mga rehimen na may kaparehong pananaw.

Pagtutol sa 'hegomoniya' ng Kanluran

Noong nakaraang Nobyembre, si Russian Deputy Prime Minister Dmitry Chernyshenko ay bumisita sa Caracas, kung saan ang mga talakayan ay nakatuon sa pagpapalitan ng impormasyon ng intelihensiya, kooperasyong militar, at mga proyektong pang-enerhiya. Tiniyak ni Chernyshenko sa mga opisyal ng Venezuela ang kahandaan ng Russia na mag-supply ng mga makabagong sandata at kagamitang militar, na lalong magpapalalim ng impluwensiya ng Moscow sa sistema ng depensa ng bansa.

Kasabay nito, pinalalakas ng Iran ang ugnayan nito sa Venezuela. Ang pagbisita ni Iranian Deputy Defense Minister Aalami Morteza sa Táchira noong nakaraang Nobyembre, na naglalayong tiyakin ang pag-aangkat ng baka, ay nagpapakita ng interes ng Tehran sa pagpapalalim ng ugnayang pang-ekonomiya. Tinalakay ang plano ng pag-aangkat ng humigit-kumulang 11,000 ulo ng baka buwan-buwan patungong Iran, bagaman hindi pa inilalabas ang mga detalye.

Ang mga alyansang ito ay mahalaga para kay Maduro, na patuloy na inihihiwalay sa Kanlurang Hemispero.

Ang halalang pampanguluhan ng Venezuela noong 2024, na malawakang binatikos dahil sa mga iregularidad, ay naging daan upang maghain ng ebidensiya ng pagkapanalo ang kandidato ng oposisyon na si Edmundo González Urrutia, ngunit ito ay ibinasura lamang ng mga awtoridad sa halalan na kontrolado ni Maduro. Maging ang mga kaalyado, tulad ni Colombian President Gustavo Petro, ay nanawagan ng makatotohanang resulta ng halalan, dahilan upang umasa si Maduro sa suporta ng mga awtoritaryan na rehimen.

Ang mga rehimeng ito, gaya ng Russia, China, at Iran, ay patuloy na nagbibigay kay Maduro ng suportang pang-ekonomiya at pagiging lehitimo sa pulitika.

Ang suportang ito ay hayagang ipinamalas sa isang paradang militar sa Caracas noong Hulyo, nang purihin ni Maduro ang kaniyang alyansa sa "aming kapatid na Russia, kapatid na China, kapatid na Iran" para sa pagbibigay ng drone at anti-drone combat technology.