Mga influencer ng Tsina, ikinakalat ang mensahe ng partido

Ayon sa Global Watch | 2026-04-02

Tahimik na pinapakilos ng Tsina ang mga lokal na influencer at sikat na personalidad upang isama ang mensahe ng Chinese Communist Party sa kanilang pang-araw-araw na content.

Sa paraang ito, nagiging personal at kapani-paniwala ang mensahe ng gobyerno, hindi parang galing sa itaas; naaabot nito ang daan-daang milyong tao sa loob ng bansa at unti-unting nakakaimpluwensiya sa mga tao sa buong mundo sa paraang bihirang maipakita sa karaniwang ulat.

Ang pagpapalaganap ng naratibo ay hindi lamang nakatuon sa mga social media personality, umaabot na ito sa mas malawak na network na gumagamit ng mga civic group, samahan ng negosyo, at mga organisasyong pangkomunidad para gawing normal ang mga kagustuhang pulitikal ng Beijing sa pang-araw-araw na buhay.

Pinalalakas ang mga makabayang boses

Naghahatid na ngayon nang maingat na inihandang makabayang content ang mga kilalang personalidad na dati'y nakatuon lamang sa lifestyle o entertainment.

Nananatiling aktibo pa rin bilang influencer ang dating editor ng Global Times na si Hu Xijin, na may higit sampung milyong tagasunod sa Weibo at Douyin, at inilalarawan ang bawat alitang internasyonal bilang pagpigil ng Kanluran.

Mas pinaigting pa ito ng mga mas batang “little pink” na creator at mga sinanay ng estado na mga key opinion leader (KOLs), sa paggawa ng maiikling video na nagpapakita ng “positibong enerhiya” habang binabalewala ang mga isyu sa karapatang pantao sa Xinjiang o Hong Kong.

Nagsasagawa ang Cyberspace Administration of China ng regular na training camp para sa mga piling influencer at tinuturuan silang gumawa ng viral na video gamit ang mga aprubadong naratibo.

Ipinakita ng pag-aaral ng Mercator Institute for China Studies noong 2025 na mahigit 500 na kilalang mga KOL ang nakatanggap ng direktang gabay at mga insentibo noong nakaraang taon.

Pinaghalong mga fashion haul, travel tip, at cooking clip ng mga creator ang mga banayad na pambabatikos sa “mga kaaway na banyaga,” kaya halos hindi nakikita ng mga ordinaryong manonood ang propaganda.

Ganito rin ang patuloy na nakikita sa mga teknolohiya ng Tsina.

Natuklasan sa ulat tungkol sa mga AI model ng Tsina na sinasala nila ang mga pangyayari sa kasaysayan, tinatanggal ang kritisismo sa mga lider ng bansa at inaayon ang sagot sa mga naratibo ng Communist Party. Ipinapakita nito kung paano ipinapasok mismo sa AI ang propaganda, kaya naaapektuhan nito ang mga digital na kagamitang ginagamit ng mga tao araw-araw.

Pinalalawak ang abot sa ibang bansa

Hindi gaanong nakikita ang pag-export ng modelong ito sa pamamagitan ng mga overseas Chinese influencer at mga platform ng diaspora.

Hinihikayat ng Beijing ang mga creator sa Europa at Hilagang Amerika na mag-post sa lokal na wika, para ipakita ang Tsina bilang matatag na alternatibo kumpara sa magulong Kanluran.

Ipinakita ng mga analyst sa Australian Strategic Policy Institute kung paano nagko-coordinate ang mga account na ito tuwing may tensyon sa Taiwan o insidente sa South China Sea, at pinupuno nila ang mga platform ng tila organikong suporta sa posisyon ng Beijing.

Ipinaliwanag ni Senior Fellow Samantha Hoffman ang lohika: “Napagtanto ng Partido na madaling balewalain ang mga opisyal na tagapagsalita. Ang mga influencer na parang lokal ang tunog ay lumilikha ng kapani-paniwalang dahilan at emosyonal na koneksyon na hindi kayang gawin ng state media.”

Sinusuportahan ng mga influencer ang pagpapalawak ng impluwensya ng militar ng Tsina at ang diplomasiya ng Belt and Road Initiative.

Binabawasan nito ang kritisismo mula sa ibang bansa at pinananatili ang pagkakaisa sa loob ng bansa nang hindi lamang umaasa sa mahigpit na pagbabawal ng impormasyon.

Nagbabala ang mga political analyst na habang lumalawak ang mga network na ito, unti-unti nilang winawasak ang tiwala sa bukas na impormasyon sa buong mundo, na nagdudulot ng bagong panganib sa pandaigdigang seguridad.

Ginagamit ng Tsina ang tila hindi nakapipinsalang social media bilang pangunahing sandata sa pagpapalaganap ng kanilang naratibo. Tahimik nitong sinusuportahan ang kanilang ekonomiya at militar, kahit na bihirang iniuulat ito.