North Korea pinalawak ang papel sa Ukraine war, nagpadala ng libu-libong sundalong pangkonstruksyon sa Russia

Ayon sa AFP | 2025-11-10

Habang nagkukumahog ang Russia na mapanatili ang lakas nito sa digmaan sa Ukraine, muling bumaling ang Moscow sa isa sa iilang natitirang kaalyado nito para sa suporta sa lakas-tao.

Ayon sa ahensiya ng intelihensiya ng South Korea, nakapagpadala na ang North Korea ng mga 5,000 tropang pangkonstruksyon sa Russia mula Setyembre, at inaasahan ang mas maraming pagpapadala sa mga darating na buwan.

Ang pinuno ng North Korea na si Kim Jong Un ay pinalakas ang loob ng digmaan sa Ukraine, matapos niyang makuha ang mahalagang suporta mula sa Moscow kapalit ng pagpapadala ng libu-libong tropa upang lumaban kasama ng mga puwersa ng Russia.

Ang mambabatas ng South Korea na si Lee Seong-kweun ay nagsabi sa mga mamamahayag noong Nobyembre 4 na “mga 5,000 military personnel ng North Korea ang ipinadadala sa Russia sa magkakahiwalay na pagkakataon mula noong Setyembre at inaasahang gagamitin para sa rekonstruksyon ng imprastruktura."

Idinagdag niya na “ang patuloy na mga senyales ng pagsasanay at pagpili ng mga tauhan bilang paghahanda para sa karagdagang pagpapadala ng mga tropa.ay natuklasan."

Sinabi ng ahensiya ng intelihensiya sa mga mambabatas na tinatayang nasa 10,000 sundalo ng North Korea ang kasalukuyang ipinadadala malapit sa border ng Russia at Ukraine, ayon kay Lee.

Tinatayang hindi bababa sa 600 sundalo ng North Korea ang nasawi sa digmaan sa Ukraine at libu-libo pa ang nasugatan, ayon sa South Korea.

Sinasabi ng mga analytst na ang North Korea ay tumatanggap ng tulong pinansyal, teknolohiyang militar at mga suplay ng pagkain at enerhiya mula sa Russia kapalit ng pagpapadala ng mga sundalo.

Dahil dito, naiwasan nito ang mahigpit na pandaigdigang sanction na ipinataw sa mga programang nukleyar at misayl nito, na dating mahalagang bargaining chip para sa Estados Unidos.

Pakikipag-usap sa US

Mula nang mabigo ang 2019 summit ni Kim kay US President Donald Trump ukol sa saklaw ng denuklearisasyon at pag-alis ng mga parusa, paulit-ulit nang idineklara ng Pyongyang ang sarili bilang isang “hindi na mababaligtad” na estadong nuklear.

Hindi tumugon ang Pyongyang sa alok ni Trump na makipagpulong kay Kim kamakailan, at sa halip ay nagtungo ang Foreign Minister na si Choe Son Hui sa Moscow, kung saan nagkasundo sila ni Russian President Vladimir Putin na palakasin ang ugnayang bilateral.

Sinabi ni Lee na ang ahensiya ng espiya ng Seoul ay naniniwala na bukas si Kim sa pakikipag-usap sa Washington “at makikipag-ugnayan kapag ayos na ang mga kundisyon.”

Bagaman hindi natuloy ang iminungkahing pagpupulong kay Trump, “maraming palatandaan ang nagpapahiwatig” na ang Pyongyang “ay naghahanda sa likod ng mga eksena para sa posibleng pakikipag-usap sa US," sinabi ng mambabatas.

Noong Setyembre, lumabas si Kim kasabay nina Chinese President Xi Jinping at ni Putin sa isang engrandeng parada militar sa Beijing — isang kapansin-pansing pagpapakita ng kanyang bagong, mas mataas na katayuan sa pandaigdigang politika.

Isang internasyonal na grupong nagmomonitor ng mga sanction, ang Multilateral Sanctions Monitoring Team, ang nagsabi sa isang ulat noong nakaraang buwan na ang North Korea ay nagpaplanong magpadala ng "40,000 manggagawa sa Russia, kabilang ang ilang delegasyon ng mga IT worker.”

Sa ilalim ng sanction ng UN, ang mga manggagawa ng North Korea ay binabawalan kumita ng pera sa ibang bansa.