AI ng PLA ng China: Bagong estratehiya sa intelihensiya at cognitive warfare

Ayon kay Li Hsian | 2025-07-18

Sa mga nagdaang taon, aktibong namuhunan ang People’s Liberation Army (PLA) ng China sa generative artificial intelligence (AI) para sa mga application mula sa pagsusuri ng intelihensiya hanggang sa operasyon ng impluwensiya, ayon sa mga mananaliksik.

Isinasama ng PLA at ng industriya ng depensa ng China ang mga lokal at dayuhang large language model (LLM) upang bumuo ng mga generativeAI tool para sa operasyon ng militar at intelihensiya, ayon sa isang ulat na inilathala noong Hunyo 17 ng Insikt Group, ang threat research division ng cybersecurity firm na Recorded Future.

Dinisenyo na ng PLA ang mga pamamaraan at sistema na gumagamit ng generative AI para sa mga pangunahing gawain sa intelligence tulad ng paggawa ng mga produktong open-source intelligence (OSINT), pagproseso ng satellite imagery, pagkuha ng datos sa mga kaganapan at pamamahala ng intelligence data.

Ayon pa sa ulat, ilang Chinese defense contractor ang nagkumpirmang nagbigay sila ng mga tool sa mga yunit ng PLA gamit ang mga lokal na modelong gaya ng DeepSeek. Maaaring agad itong ginamit ng PLA matapos ang paglabas ng mga bersyong V3 at R1 noong Disyembre at Enero.

Ipinakita ng mga patent filing na sinuri ng Insikt Group at Reuters, na ang ilang state-affiliated research institute, kabilang ang Academy of Military Sciences, ay nagbigay ng mungkahi na sanayin ang mga military LLM gamit ang mga multisource intelligence input, kabilang ang OSINT, human, signal, geospatial, at technical intelligence.

Layunin ng mga modelong ito na suportahan ang lahat ng yugto ng intelligence cycle at pahusayin ang kakayahang magdesisyon sa larangan ng labanan.

Kapansin-pansing may ilang proposal na nagsusulong ng paggamit ng video generation model ng OpenAI na Sora para sa cognitive warfare, kabilang ang paggawa ng mga peke ngunit makatotohanang larawan upang maimpluwensyahan ang desisyon ng kalaban.

“Ginamit na ng ilang covert influence network ng China ang generative AI para sa mga online influence operation,” ayon sa ulat ng Insikt Group, patunay na ang antas nito ay lumipat na mula sa eksperimental patungo sa aktwal na operasyon.

Ang mabilis na pagpapalawak ng AI infrastructure ng China ay nagdudulot ng mga pangamba.

Ayon sa isang joint report ng Strider Technologies at ng Special Competitive Studies Project noong Mayo, nakapagtayo na ang China ng hindi bababa sa isang data center sa bawat lalawigan.

Pagsapit ng kalagitnaan ng 2024, nabuo o inanunsyo na ng China ang mahigit 250 AI data center upang maabot ang target na 105 EFLOPS (sukatan ng computing power) sa AI computing pagsapit ng 2025. Ang inaasahang kabuuang computing capacity ay maaaring lumampas sa 750 EFLOPS sa lahat ng workloads.

Natukoy din sa ulat ang dalawang overseas facilities, isa na aktibo mula pa noong Mayo 2024 sa Jakarta, at isa pang inanunsyo sa Pasig, Philippines sa unang bahagi ng 2025, bilang bahagi ng pagsisikap ng China na palawakin ang global computing capacity nito sa kabila ng US export controls.

Mataas na peligro

Kung maisasama ng China ang generative AI sa pagsusuri ng intelihensiya at pagpaplanong militar, maaaring makamit ng PLA ang mas mataas na kamalayan sa paligid sa rehiyong Indo-Pacific, lalo na sa Taiwan Strait, South China Sea, at East China Sea, ayon kay Wang Xiu-wen, assistant research fellow sa Institute for PRC Military Affairs and Operational Concepts ng Institute for National Defense and Security Research (INDSR) ng Taiwan, sa panayam ng Focus, isang affiliate publication ng Global Watch.

Aniya, tila lalo pang lumalalim at humuhusay ang AI-assisted decision-making ng China.

May mga sistemang gaya ng “Zhàn Lú” (War Skull) na kayang mag-analisa nang mag-isa ng mga datos ng labanan, magbigay ng mga utos, at pumili ng pinakamabisang kombinasyon ng mga armas, na nagpapabilis at nag-o-automate sa labanan gamit ang unmanned platforms.

Gayunpaman, sinabi ni Wang na ang kasalukuyang generative AI ay maaari pa ring makagawa ng malulubhang pagkakamali sa impormasyon.

Sa mga rehiyong may mataas na peligro, maaari itong magdulot ng hindi inaasahang mga komprontasyon.

Habang pinabibilis ng PLA ang militarisasyon ng generative AI, patuloy na humaharap sa mas matitinding hamon ang pandaigdigang seguridad.

Isang ulat noong 2023 mula sa Center for a New American Security ang nagsabing, “Ang malungkot ngunit hindi maiiwasang realidad ay may nagaganap na labanan ng makabagong teknolohiya sa militar sa Silangang Asya, kung saan kabilang ang military AI.”

Ang AI-enabled cognitive warfare at mga disinformation campaign ay lalo pang nagpapagulo sa information environment sa mga sensitibong rehiyon tulad ng Indo-Pacific, na nagpapadali ng pagsisimula ng kumprontasyon.

Upang matugunan ang mga banta, inirerekomenda sa ulat ng Insikt Group na masusing subaybayan ng United States at ng mga kaalyado nito ang mga pagbabago sa paggamit ng AI ng PLA, suriin ang mga panganib kaugnay ng technology transfer at counterintelligence at bumuo ng mga estratehikong tugon.

Hinimok din ni Wang ang mga demokratikong bansa sa Indo-Pacific na pabilisin ang pagpapalitan at pagsasama-sama ng mga intelihensya, at pag-aralan ang mga teknolohiyang gaya ng blockchain para sa decentralized information storage. Ang paggawa nito ay makatutulong sa pagpapahusay ng kakayahan at tibay sa pagtugon sa mga AI-driven military intelligence system ng China.