Korapsyon sa Russia, nagpapahina sa Moscow sa pakikidigma sa Ukraine

Ayon kay Tony Wesolowsky | 2025-04-08

Ang malawakan at sistematikong korapsyon ay nagpapahina sa makinarya ng pakikidigma ng Russia sa pamamagitan ng pagpapahina ng kakayahan nitong pataasin ang produksiyon ng armas at suportahan ang magastos at hindi makatarungang pagsalakay sa Ukraine, na tumutulong na pumabor ang labanan sa panig ng Kyiv, ayon sa isang ulat.

Ang talamak na antas ng korapsyon ay "malakas na nakakapag-predict" ng kalalabasan ng digmaan, ayon kay Nathan Decety, isang strategy consultant at kapitan sa US Army, sa isang kamakailang artikulo para sa Center for European Policy Analysis (CEPA), isang think tank na nakabase sa Washington na nakatuon sa seguridad.

"Ang isang bansa na kalahati lang ang korapsyon kumpara sa kalaban nito ay may mas mataas na posibilidad na manalo sa digmaan ng humigit-kumulang 70%, kung pantay sa lahat ng bagay", sabi ni Decety.

Laganap na katiwalian

Laganap ang korapsyon sa Russia, na nakapagtala lamang ng 22 mula sa 100 puntos at pumwesto sa ika-154 na pwesto mula sa 180 bansa sa pinakahuling Corruption Perceptions Index ng Transparency International, ang global watchdog laban sa katiwalian.

Ito ang "pinakamalalang performance ng Russia sa kasaysayan ng index", ayon sa pagsusuri.

Lumantad ang lawak ng korapsyon noong Disyembre nang sinabi ni Igor Krasnov, ang prosecutor general ng Russia, na halos 30,000 opisyal ng gobyerno ang nahuli at naparusahan dahil sa paglabag sa mga patakaran laban sa katiwalian noong 2024.

Hindi bababa sa kalahati ng lahat ng kaso ng korapsyon ay may kinalaman sa panunuhol, at halos 19,000 ganitong krimen ang nadiskubre sa unang siyam na buwan ng 2024, ayon kay Krasnov.

Ang mga assets, kabilang ang mga pondo at ari-arian -- na nagkakahalaga ng $7.6 bilyon sa kasalukuyan -- ay kinumpiska sa nakaraang limang taon mula sa mga opisyal na inakusahan ng korapsyon, ayon sa kanya.

Sa militar, "ang korapsyon ay nakakaapekto sa lahat ng aspeto ng makinarya ng pakikidigma ng Kremlin, mula sa mga desisyon sa pagbili hanggang sa aktwal na pagpapakita nito sa larangan ng digmaan," sabi ni Decety.

Ang mga kickback ay tinatayang magdodoble sa mga gastos ng mga military procurement, na kumakatawan sa halos 40% ng budget ng militar ng Russia, dagdag pa niya.

Mga gastusin sa defense

Ang mahinang ipinakita ng Moscow sa larangan ng digmaan ay maaring ipaliwanag na may bahagi ang korapsyon, ayon kay Decety, at binanggit niyang ang pag-usad ng militar ng Russia patungong Kyiv noong 2022 ay nakaranas ng kakulangan sa gasolina at mga piyesa para sa mga kagamitang pandigma, na ang ilan sa mga ito ay hindi na-maintain nang maayos bilang resulta.

Ang paghinang iyon ay naging hadlang sa 64 km na haba ng convoy ng Kremlin na target ang kabisera ng Ukraine.

Noong 2024, gumastos ang Moscow ng mahigit sa $462 bilyon para sa militar, na mas malaki kaysa sa kabuuang paggasta ng buong Europe. Gayunpaman, inaasahan na magbabago ito sa 2025, dahil inaasahan na ang mga bansa sa European Union ay gagastos ng tinatayang $540 bilyon para sa depensa.

Hindi katulad ng sa Russia, karamihan sa pera ng Europe na inilalaan para sa defense ay inaasahang magkakaroon ng positibong epekto, ayon kay Decety.

"Sa maikling panahon, ang mas malinis at epektibong defense ng Europe ay makatitiyak na mas mahusay na magagamit ang tumataas na gastusing militar, imbes na malustay sa katiwalian," isinulat niya.

Ang korapsyon ay isa lamang sa maraming lumalalang problema na kinakaharap ng Russia habang palapit na sa ika-apat na taon ang pagsalakay nito sa mas maliit na kapitbahay. Ang ekonomiya ng bansa ay pinahihirapan nang patuloy na pagtaas ng mga bilihin at kakulangan sa mga manggagawa.

'Kahibangan ni Putin'

Inaasahan ng mga analyst mula sa think tank na Institute for the Study of War na nakabase sa Washington na ang malawakang korapsyon sa Russia ay malamang na magpalala pa ng problema sa ekonomiya ng bansa mula sa pakikidigma sa Ukraine.

"Ang lumalaking mga problema sa ekonomiya ng Russia dulot ng digmaan, kasama ang malawakang korapsyon, kakulangan ng mga manggagawa, at hindi epektibong Defense Industrial Base (DIB) ng Russia, ay malamang na magpalaki pa ng gastos ng digmaan at higit pang magpahina sa kakayahan nitong ipagpatuloy nang epektibo ang mga operasyon ng DIB habang pinananatili ang katatagan ng ekonomiya," ayon sa isang ulat noong Disyembre.

Ang ruble ng Russia ay nakaranas ng pagbaba ng halaga mula nang magsimula ang digmaan. Sa ngayon, ang halaga nito ay nasa 85 rubles sa kada dolyar ng US, kumpara sa 75 rubles bago ang Marso 2022

Habang itinatakwil ang kanyang bansa at nahaharap sa mga pandaidigang parusa, ang Russian leader na si Vladimir Putin ay gumastos ng malaki para sa paggawa ng mga armas, pagre-recruit ng mga sundalo, at mga bayad sa mga pamilya nila.

Ang Russia ay mas lalongumaasa sa mga reserbang yuan ng China at mga pagbebenta ng ginto upang matustusan ang kakulangan sa budget, ayon sa Center for Countering Disinformation ng Ukraine. Binanggit din nito na ang mga assets ng Russia sa National Welfare Fund ay bumagsak mula sa $140 bilyon noong Pebrero 2022 hanggang sa $53.8 bilyon noong Disyembre 1, 2024.

Ang Russia ay "nagwaldas" nang mahigit $200 bilyon sa hindi makatarungang agresyon nito sa Ukraine, sabi ng dating US Secretary of Defense na si Lloyd Austin sa Reagan National Defense Forum noong Disyembre.

"Napakalaki ng naging kabayaran ng Russia para sa kahangalan ni Putin," aniya.